Eskoriatzako auzoetarako bideen konponketa eta bestelako inbertsioak iragarri ditu aldundiak

2010 urtean 418 milioi euro bideratuko ditu Gipuzkoako Foru Aldundiak errepide berriak egitera eta daudenak hobetzera. Honela, Gipuzkoako biribilgunea deitzen duten errepide sareko lanekin jarraituko dute. Azpiegitura horien artean daude, besteak beste, Arrasateko mendebaldeko saihesbidea eta Beasain-Bergara ardatza. Eskoriatzan Apotzaga, Mazmela eta Zarimutz auzoetarako bideak konponduko dituzte.

Arrasatekoa datorren urtean amaituko dute, eta Beasain-Bergarari dagokionez Urretxu eta Antzuola arteko lanak hasiko dira. Lan hauen barruan tunela egingo dute Deskargako mendatea saihesteko.

Honez gain, Diputazioak iragarri du datorren urtean ardatz nagusietan inbertsio handiak egingo dituztela errepideen artapenean, mantenuan eta segurtasunean, 43 milioi euro baino gehiago.

Baina beste lan batzuen berri ere eman du aldundiak. Eskoriatzan berritu egingo dituzte Apotzaga, Mazmela eta Zarimutz auzoetarako bideak. Lau kilometro eskas dira denera, eta 770.000 euro bideratuko dituzte lanotara. Lanak enkantera aterata daude, eta bi hilabete eta erdiko epean amaitu beharko dira. Bigarren mailakoak dira aipatutako hiru auzoetarako bideak. Ap-1 autobideko lanetan ibili ziren ibilgailu astunek errepide berrira iristeko erabiltzen zituzten, eta oso hondatuta geratu ziren ondorioz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.