Eskoriatza eta Luku arteko AP1 autobidearen tartea zabaldu dute

Gaur eguerdian egindako ekitaldian inauguratu dute Eskoriatza eta Luku arteko AP1 autobidearen tartea. Tarte honekin, autobidearen beste 17 kilometro erabilgarri daude dagoeneko; autobide osoa irekitzeko baina, ekainera arte itxaron beharko da. Inaugurazio ekitaldian, Araba eta Gipuzkoako Aldundietako eta Jaurlaritzako hainbat arduradun egon dira, tartea, Juan Jose Ibarretxe jarduneko lehendakaria.

Euskadiko Tunelik luzeenaren, Isuskitzako tunelaren barruan egin dute gaur eguerdian Ap-1 autobidearen Eskoriatza eta Luku arteko tartearen inaugurazioa.
Ekitaldian parte hartu dute besteak beste, Juan Jose Ibarretxe jarduneko lehendakariak, Markel Olano Gipuzkoako Aldun nagusiak eta baita Arabako aldun nagusia den Xabier Agirrek ere. Debagoieneko alkaterik ere ikusi ahal izan da bertan, Eskoriatzako Pedro Lasagabaster eta Aretxabaletako Inazio Garro, hain zuzen ere. Denek ere, Gipuzkoa eta Arabaren arteko muga zeharkatzen duen tunela barrutik ezagutzeko aukera izan dute.

Jaurlaritzako eta aldundiko beste hainbat ordezkari ere egon dira Isuskitzan, eta hedabideen aldetik, interes handia piztu du ekitaldiak. 17 kilometro ditu gaur ireki duten autobidearen zatiak, eta honekin, autobideak dituen 7 zatietatik 6 irekita daude dagoeneko.Tarte honen barruan sartzen da Eskoriatza eta Isuskitza arteko zatia, 10,8 kilometro dituena. Gipuzkoatik igarotzen da tarte honen gehiengoa, eta bere baitan ditu bost zubi eta bi tunel. Isuskitzako tunela, hain zuzen ere, Euskadiko luzeena da: 3,4 kilometro ditu: horietatik 2 kilometro pasatxo Gipuzkoan daude, gainerakoa Araban.

Tunelik luzeena izanda, bere inguruko zenbakiak ere ez dira makalak: 3 hodi lotura daude autoen pasabiderako, eta beste 8 oinezkoen pasabiderako. 81 kontrol kamera, 247 bozgorailu, 46 haizagailu eta 63 larrialditarako zutabe. Honetaz gainera, segurtasun elementuak ere ugari dira. Arrasate eta Eskoriatza arteko zatia da AP1 autobidea osatzeko irekitzeko geratzen den bakarra. Arduradunen esanetan, ekainean irekiko dute zati hau, eta ordura arte, doakoa izango da Eskoriatzatik Lukura arteko zatia.



ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.