“Gurasook parte-hartze zuzena dugu gure umeen menuan. Herriko dendetan erosten ditugu jakiak eta badakigu jaten dutena nondik datorren”, azaldu du Miren Plazaolak, Oñatiko Errekalde Herri eskolako guraso batzordeko lehendakariak. Bergarako gurasoko elkarteko arduradunak ere azaldu du euren lan egiteko eredua Oñatikoaren berdina dela.
Menu itxiak
“Hezkuntza sailak ezarri gura duen ereduaren arabera, catering enpresak berak ekarriko lituzke jakiak; gainera, menuak hiru hilabeterako izango lirateke eta itxiak. Guk, ostera, hilero egiten ditugu menuak”, dio Plazaolak bi ereduen arteko aldeaz galdetuta.
2000. urteko dekretua
Hezkuntza sailaren eredua 2000. urtean sartu zen indarrean dekretu bitartez. “Baina han esaten da salbuespen moduan, gestio ez zuzeneko jangelak mantenduko direla. Hortaz, guk horri heldu diogu”, dio. Orain, Hezkuntza sailarekin harremanetan dihardute.
Hezkuntza Sailak gogorarazten du administrazioak ikastetxe publikoetako jangelak zuzenean kudeatzeko agindua 2000. urtekoa dela. Hezkuntza Saileko langileak diren sukaldariak ikastetxe publikoetan egotea da helburua.
440 ikastetxe
Gaur egun, sare publikoko ikastetxeetako jangela ia guztiak –440– zuzenean kudeatzen ditu Hezkuntza Sailak, eta azpimarratzen du baldintza "zorrotzak" dituela. Hala ere, gertu dago euren ereduarekin jarraitu nahi duten eskolekin hitz egiteko.