Norbera erroldatuta dagoen herriko udaletxean dago datuak ikusteko aukera, udaletxeko ordutegian. Zuzenketarik edo erreklamaziorik egin nahi duenak inprimaki bat bete behar du.
Era berean, bozkatzeko eskubidea duen herritar bakoitzak zentsu-txartel bana jasoko du bere datuekin.
Oro har, Euskal Autonomia Erkidegoan, aurreko hauteskundeetan –2005eko apirilekoak– baino jende gutxiagok izango du bozkatzeko aukera oraingoan: 1.789.896 biztanlek, hain zuzen, 2005ean baino 9.604 gutxiagok.
Posta bidez
Beste epe bat ere zabalik dago, maiatzaren 17ra bitartean: posta bidez bozkatzeko aukera eskatzeko epea, hain zuzen ere.
Horretarako, bozkatzaileak berak egin dezake eskaera, dagokion posta bulegoan. Posta bulegoak eskaera helaraziko dio dagokion Probintzia Ordezkaritzari. Interesatuak posta bulego berean jasoko ditu bozkatzeko dokumentuak handik gutxira.
Ezker abertzaleak sinadurak batzen dihardu egunotan
Herri plataformak eratzeko, sinadurak batzen ibili da ezker abertzalea. Udal bulegoetan ibili dira lan horretan; argazkian, Bergarako Udal Idazkaritzan sinadura batzea. Arrasaten eta Bergaran, joan den astean hasi ziren; Antzuolan, egunero egongo dira udaletxean, 09:00-15:00 ordutegian; Eskoriatzan, gaur eta bihar; eta Oñatin, gaur eta bihar, 18:00-20:00, eta etzi, 14:00-16:00. Notaritzan ere eman daiteke sinadura.