Taldeak argi utzi gura du neurri horiek “prebentziozkoak”direla. Hau da, kooperatibetan egiturazko langabeziaren inguruan ager daitezkeen egoerak konpontzeko neurriak izango lirateke.
Ponentziak bi soluzio aztertuko ditu; baina aurretiko erretiroei buruzkoa da ikusmin handiena piztu duena. 55 urterekin aurretiko erretiroa hartzeko aukera aztertzen da ponentzian, eta irizpide orokor gisa iraupena 61 urtera arte luzatzeko aukera, gehienez ere sei urterako. Gaur egun aurretiko erretiroa hartzeko adina 58 urtekoa da, gehienez ere hiru urteko iraupenarekin.
Neurri hori egoera kritikoetan dauden kooperatibetan gerta daitezkeen ezohiko kasuen testuinguruan kokatzen da. Hau da, krisiei aurre egiteko neurri gisa ikusten da aurretiko erretiroa 55 urtera aurreratzea.
50-58 urte bitarteko langileei irtenbidea
Modu honetan, 50 eta 58 urte bitarteko langileei irtenbidea ematea aurreikusten da. Izan ere, gaur egun, adin tarte horretan dauden hainbat langilek ez dute erretiroa hartzeko modurik eta irtenbide barik daude 58 urte bete arte.
Lagun Aroren erabakia
Aurretiko erretiroa noiz ezarri Lagun Aroko Prestazio Batzarrak erabakiko du; hau da, ez da kooperatibarendako eskubide automatikoa izango. Kooperatiba eta egoera aztertu ostean, Lagun Arok erabakiko du aurretiko erretiroa 55 urtera aurreratu edo ez. Horretarako, Lagun Arok Kooperatiba egiturazko langabezian dagoela onartu beharko du.
Birkokapenak
Irailaren 24ko ponentzian aztertuko den beste neurria behin betiko birkokapenena izango da. Hala, irizpide berriak proposatuko dituzte egiturazko langabetuak kooperatibetan birkokatzeko. Planteamendu berriarekin birkokapena derrigor bete beharreko baldintza bihurtuko da kooperatiba hartzailearentzat.
Beste neurriarekin gertatzen den bezala, Kooperatiba egiturazko langabezian dagoela onartu beharko du Lagun Aroko Prestazio Batzarrak neurria ezartzeko orduan. Hori guztia hilaren 24ko ponentzian aztertuko dute.