Merkatu berriak zabaldu direla argi dago; eta, horietako bat ezkongabeena edo familia unitate txikiena da. Familia unitate txikietan umerik gabeko bikoteak eta ezkongabeak sartzen dira.
Gora doan merkatua
Ezkongabeena gora doan merkatua dela ohartuta, Eroskik hauei zuzenduta denda bereziak irekitzea erabaki du. Denda horiek txikiak izango dira, 400 metro koadrotik beherakoak. Helburua, erosketak agudo egitea izango da, eta eroso; itxaroten egon barik eta ilarak pairatu barik. Bestalde, Eroski Merca dendetan produktu jakin batzuk egongo dira. Guztira, 1.700 produktu jarriko dituzte salgai; Eroskik adierazi du produktu horiek eguneroko erosketetan erosten diren produktuak izango direla, hau da, kontsumo handiko produktuak.
Salmahairik gabe
Eroski Merca dendek ez dute, besteak beste, arraina eta okela saltzeko salmahairik izango. Produktu guztiak ontziratuta egongo dira eta norberak hartu beharko ditu. Gainera, fruta eta barazkiak banaka hartzeko aukera egongo da.
Gaur egun ezagutzen diren Eroski etxeko gainontzeko dendekin alderatuta, produktuen salneurrien etiketak elektronikoak izango dira. Gainera, dendetako instalazioak ekoeraginkorrak izango dira, eta izango duten argi instalazio berezia dela-eta, %30a aurreztuko dute dendok. Zorua erradiatzailea izango dute; modu honetan, denda barruko bero-energia ez da kanporatuko, eta lokala bera berotzeko erabiliko da. Gainera, puntako hotz energia izango dute.
Eroski Merca dendek diseinua zainduko dute; behar bereziak dituzten erosle jakinei zuzendutakoak izango dira.
Poltsa ekologikoa
Ekainaren 5etik aurrera daude kontsumitzailearen esku poltsa ekologiko eta berrerabilgarriak. Eroski taldeak ingurugiroaren alde egindako apustua izan da poltsena. Poltsa ekologikoa material birziklatuz egina dago, eta erosteko poltsa konbentzionalarekiko aukera da. Hori erabilita 15 poltsa tradizional erabiltzea galaraziko da.
Poltsa ekologikoa eskuratzeko 10 euro zentimo ordaindu behar da; poltsa hondatzen bada, bigarren poltsa doan eskuratzeko bidea dago. Kontsumitzailea informatzeko, informazioa stand-ak jarriko ditu Eroskik.