Debagoieneko enpresa berriak sortzeko laguntza emateko asmoz, auzolandegi berezi bat antolatu du Saiolan enpresa eta berrikuntzarako zentroak. Inoiz euren enpresa sortzeko ametsa izan duten lagunei dago zuzenduta; parte hartzeko baldintza da ikasketak bukatutako gaztea edo langabea izatea.
Auzolandegia Bergarako Elosu auzoan egingo dute, uztailaren 16tik 29ra bitartean. Naturaz inguratuta, taldekideak elkarrekin bizi izango dira 15 egunez, eta, bitartean, auzolandegian lan egingo dute eta enpresa sortzeko formazioa jasoko dute.
Lana eta hezkuntza
Honela dago antolatuta egonaldia: goizean, Elosuko eliza ondoko etxe zaharkitua hobetu edo berrituko dute.Arratsaldean, hiru motako hezkuntza jasoko dute parte-hartzaileek: ekintzailetza, espiritu kooperatiboa eta enpresen bideragarritasun planak ikasiko dituzte. "Benetako kasuak, praktikak,talde lana...landuko dituzte, eta saio arinak izango dira. Saiolango tutoreek emango dituzte , eta baita hemengo kooperatibetako ordezkariek, enperesa berrietako ekintzaileek", azaltzen du Larreak.