Elkarrekin bidea egiten... eta elkarrekin ospatuz leloa aukeratu dute ospakizun horretarako. Arrasateko Amaia antzokian izango da hori, 17:30ean.
Ohiko agurraren ostean, Hartu eta Emun ikus-entzutekoa ikusiko dute han biltzen direnek. Kooperatibaren aurkezpena eta urteetan izan duen bilakaeraren berri emango du horrek.
Jarraian erakunde publikoetako eta enpresetako ordezkariak igoko dira agertokira. EMUNeko lehendakari Ima Elexpuruk, Arrasateko alkate Ino Galparsorok, Eusko Jaurlaritzako Hizkuntza Poltikarako sailburuorde Patxi Baztarrikak, MCCko lehendakari Jose Mari Aldekoak eta Gipuzkoako diputatu nagusi Markel Olanok hartuko dute hitza.
Omenduak
Hainbat lagun ere omenduko dituzte; kooperatibaren sorreran eta hazkundean parte hartu dutenek. Eguneroko jira-biran bertso antzerkiarekin amaituko da ekitaldia.
EMUNek zuzendari nagusi Dani Larreak orain arteko ekimenen balorazioa egin du. Enpresa barrura begira Zumaiara egindako irteera eta Motibazioa eta euskararen normalizazioa lelopean, Arantzazun egindako jardunaldiak azpimarratu ditu.