18/98 auzia dela-eta, Jose Luis Elkoro eta gainontzeko zazpi atxilotuen askatasuna eskatzeko manifestazioa egin zuten atzo arratsaldean Bergaran. Antolatzaileen arabera, 800 lagun inguruk parte hartu zuten horretan. Elkoro Martutenen espetxeratzen zuten bitartean, Espainiako Auzitegi Gorenak jakinarazi zuen Ekin atalagatik zigortutako Natale Landa arrasatearraren absoluzioa eskatuko duela.
Espainiako Auzitegi Gorenak 18/98 auziaren gainean oraindik behin behineko epaia eman ez badu ere, Auzitegi Nazionalak behin-behineko askatasuna zuten zortzi lagun atxilotzeko agindua eman zuen joan den eguaztenean; tartean, Jose Luis Elkoro.
Guardia Zibila eguaztenean bertan, 22:00etan, izan zen 74 urteko buruzagi abertzale historikoaren etxean, baina ez zuten han topatu. Haren bila zenbiltzatela jakinda, gaua etxean eman zuen eta eguen goizean, 08:30ak inguruan, atxilotu zuten.
Elkorok etxekoekin hitz egin du
Haren semea Iñigo Elkorok jakinarazi digu eguenean oraindik Gipuzkoan jarraitzen zuela aita. Arratsaldean, Jose Luisek etxekoei deitu zien Martuteneko kartzelatik. Gertatutakoa "oso larria" bazen ere, animu aldetik, aita "nahiko" ondo igarri zuela jakinarazi zuen. Ez zekiten noiz eroango duten Soto del Realera: "Dakigun bakarra da astelehen goizean Madrilen egon behar dela".
Natale Landari dagokionez, esan bezala, Espainiako Auzitegi Gorenak jakinarazi zuen eguenean Natale Landa arrasatearra errugabe joko duela, Zumalabe ataleko zigortutakoekin batera.
Auzitegi Nazionalak hamaika urteko espetxe zigorra ezarri zion, Ekin atalaren barruan. 2007ko azaroaren 30etik preso egon ostean, joan den martitzenean libre geratu zen Landa.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
