Ia gertu dago Eibar-Gasteiz autobideko Arabako zatia. Errepidearen zati txiki batean geruza bat botatzea falta da, lan hori egitea aurreikusten zuten egunean izotza bota zuelako eta ezin izan zutelako egin. Baina hori besterik ez da geratzen egiteko eta, beraz, atzerapena oso txikia izango dela jakinarazi dute Arabako Foru Aldunditik.
Arabako Ahaldun Nagusiaren ordeko Claudio Rodriguezek adierazi du eurei dagokien errepide zatiaren ardura hartzeko moduan izango direla 15-30 egunen buruan, baina ez dutela presarik. Eta horren harira, gogoratu du Gipuzkoako lanak atzeratuta doazela eta, arrazoi horregatik, nahita ere, ezingo dutela ireki autobidea bere osotasunean automobilentzat, oraindik.
Arabako Herrilan diputatu Luis Alberto Zarrabeitiaren arabera, litekeena da Arabako zatia apirilean zabaltzea, debalde. Nolanahi ere, epe horren gaineko baieztapen ofizialik ez dago oraindik.
Urtebeteko atzerapena Gipuzkoan
Gipuzkoako zatiko lanak urte amaierarako izango dira gertu, hasiera batean aurreikusitakoa baino urtebete beranduago. Egun, Eibartik Arrasaterako zatia dago irekita autoentzat.