Eguraldi iragarpenak dio egoera okertu egingo dela arratsaldean. Elur kota 200-300 metrotaraino jaitsiko da eta gauean, 100 metrotaraino.
Aholkuak
Eusko Jaurlaritzako Larrialdiei Aurre Egiteko departamenduak eta Babes Zibileko Zuzendaritzak aholkuak eman ditu ahalik eta ondorio txikienak izateko:
- Eguraldiari buruzko informazioa aurretik eskuratu. Euskalmet-eko webgunean sartuta edo Jaurlaritzako Trafiko Zuzendaritzako zenbaki honetara deituta: 902 112 088
- Bidaiatzea ezinbestekoa bada, ziurtatu gurpilak, frenoak eta izotz-kontrakoa ondo daudela; kateak aldean eraman beti; erregaiaren depositoa bete eta sartu berokiak ere auto barruan. Telefonoa ere aldean eraman beti. Aurreko autoari tarte handia utzi; ez aldatu noranzkoa bapatean; bolanteari gozotasunez eragin eta martxa laburretan ibili; izotza dagoen zonaldera sartzean, ez zapaldu frenoa eta utzi ibilgailuari bere inertziak aurrera egiten.
- Irratia oso lagungarria izan daiteke une oro ondo informatuta egon nahi izanez gero.
Eguraldi iragarpena
Datozen egunetarako eguraldi iragarpena da:
- Osteguna, hilak 7: Elurrari dagokion abisu laranja 00tik UTC 24ra UTC. Elur-kota 400 metrora kokatuko da. Arratsaldean jaitsi eta 200-300 metrora kokatuko da, gauean 100 metrora. Azken orduetan itsasmailan kokatzeko probabilitate txikia dago. Zaparrada txikiak botako ditu, noizean behin ertainak, sarriago Kantauri isurialdeko mendebaldean eta egunaren bigarren partean; trumoitsuak eta txingorrarekin batera izateko probabilitatea handia da. Kostaldean izotz
txikia egiteko probabilitatea txikia da; barnealdean izotz txikia egingo du, zenbait lekutan handia. - Ostirala, hilak 8: Elurrari dagokion abisu laranja 00tik UTC 24ra UTC. Elur-kota 0-100 metro inguruan kokatuko da. Zaparrada txiki-ertainak botako ditu, Kantauri isurialdean batez ere; trumoiekaitza eta txingorra izateko probabilitatea handia da. Izotz txikia egingo du, barnealdeko zenbait lekutan handia.
- Larunbata, hilak 9: Elurrari dagokion abisu laranja 00tik UTC 24ra UTC. Elur-kota 0-100 metro inguruan kokatuko da. Zaparrada txikiak botako ditu, Kantauri isurialdean noizean behin ertainak. Izotz txikia egingo du, barnealdean handia.
- Igandea, hilak 10: Elurrari dagokion abisu horia 00tik UTC 24ra UTC. Goizaldean elur-kota 0-100 metro inguruan kokatu eta arratsaldean 400 metrora igoko da. Egunaren lehenengo partean zaparrada txikiak botako ditu, Kantauri isurialdean batez ere; eguna aurrera joan ahala atertuz joango da. Izotz txiki-handia egingo du, barnealdean batez ere.