Dendetako erakusleihoetan eta kaleetan jantzi arinak eta sandaliak. Eguzkiaren izpien aurka, itzala eta haize egokitua. Gorputza freskatzeko bestalde, freskagarriak eta izozkiak. Eguzkitako betaurrekoek eta biserek ere funtzio paregabea izan dute gaur... hori eta gehiago ere beharrezkoa izango da gaurko bero oldeari aurre egiteko.
Badira bi aste udan sartu ginenetik, eta orain arte eguraldi aparta egin baldin badu ere, udako bero sargoria gaur sumatu dugu. Herrizaingo sailak alerta laranja ezarri du, eta ez da gutxiagorako, termometroetako merkurioa 39 graduetaraino igo baita. Hala ere termometro bakoitzak nahi izan duen tenperatura adierazi du, baina beroa denek nozitu dute ordea.
Lanean ari zen jendea bazebilen eskualdeko herrietan, nahi izan gabe ere beltzarana hartzen. Baita gerizpea bilatu beharrean, gerizpea eurak muntatzen ere. Haurrengan ere eragin du beroak, nahiz eta bakoitzak bere eran egiten dion aurre.
Edozein eratan dela ere, gomendio orokorrei jaramon eginez gero, ez da arazorik egongo.