Eguen-gizenarekin, abiatu dira Aratuste jaiak

Eguen-gizena da gaur, Aratusteetako lehen eguna eta zenbait tokitan hasi dira dagoeneko ospakizunetan. Hala, Eskoriatzan Urdelardero ospatu dute goizean zehar. Zirian jaki ezberdinak sartuta, kalerik kale ibili dira ikastetxeetako umeak. Eta jaiari bukaera emateko, txistor jana izan dute plazan. Eskoriatzan bakarrik ez, Bergaran ere izan dute Aratusteetako ospakizunik; izan ere, San Martin Agirre ikastetxean, azken urteotan egin ohi duten legez, Hartzaren eguna ospatu dute.