Gipuzkoako Foru Aldundiak emandako datuak dira horiek: lurraldeko zortzi suhiltzaile etxeek, orotara, 1.964 irteera egin zituzten iaz; salbamendu kasuak izan ziren gehienak, eta suteak daude irteerak eragin zituzten arrazoien zerrendan hurrena.
Debagoienera etorrita, Oñatiko Zubillagako suhiltzaileek 238 irteera egin zituzten; sua itzaltzera atera ziren 115 alditan, salbamenduak egitera 108 bider eta laguntza teknikoa ematera sei kasutan; gainerako bederatzi irteerak alarma faltsuek eragindakoak izan ziren.
Esku-artze aipagarrienak
Joan den urtean izandako suteen artetik, Arrasaten izandako bat azpimarratu du Diputazioak: maiatzean Jokin Zaitegi plazan izandakoa; etxebizitza batean piztutako suaren eraginez, eraikin osoa hustu behar izan zuten. Salbamenduen atalean, bestalde, Arantzazun izandako bi esku-artze nabarmendu ditu: bihotzekoak emandako pertsona bat erreskatatu zuten ekainean, eta hanka harrapatuta zeukan zaldi bat abenduan.
Eskoriatzako AP-1 autobidean eta Oñatiko Arrikrutz kobetan, simulazio bana egin zuten.