Aretxabaletako Baster Alde; Arrasateko Aldapa, Erreka, Hilarion eta Santa Ana; Bergarako, Lasa, Tartufo, Zabala eta Zumelaga; Eskoriatzako Hotel Mendigoia; Leintz Gatzaga Gure Ametsa eta Soran; eta, Oñatiko Etxe-Aundi, Goiko Benta, Soraluze eta Zelai-Zabal jatetxeak dira jardunaldietan parte hartuko dutenak. Mankomunitateko Turismo buru den Oxel Erostarbek azaldu du aurkezpenean dinamizazioan ezinbestekoa dela turismo arloko eragileen arteko koordinazio.
Bertako produktuak
Esan behar da ez direla bakarrik jardunaldi gastronomikoak izango; hau da, produktuen jatorria, elaborazioa eta prozesua ezagutzeko aukera ere eskainiko da jardunaldiotan. "Bertako produktuak eta garaiko produktuak ezagutzera ematea izango da helburua", azaldu du Erostarbek. Hori horrela, jatetxeek eskainiko dituzten menu guztietan eskualdeko odolostea, gazta eta pellak dastatzeko aukera egongo da. "Jatetxe bakoitzak zehaztuko du eskainiko duen menua; guztiek baina, bi lehen plater, bi bigarren plater, denak errazio erdikoak, postrea, kafea, eta txakolina, sagardoa eta Errioxako ardo ondua izango dute menuan", azpimarratu du Erostarbek.
Jatetxeek zehaztutako egunak
Lasa jatetxeko Koldo Lasa, Baster Aldeko Aitor Telleria eta Hilarion jatetxeko Gabino Yarza izan ziren aurkezpen ekitaldian. Koldo Lasak azaldu zuen jatetxe bakoitzak erabakiko duela asteko zein egunetan eskainiko duen menua. Menuak 28 euro eta 40 euro artean jarri dituzte; bestalde, erreserba egitea gomendatu dute.
Museoak eta enpresak bisitatu
Jardunaldi hauen helburua Debagoieneko ondare artistiko, kultura eta naturala ezagutzera ematea da. Izan ere, gastronomiaz gain, bestelako museo eta enpresak bisitatzeko aukera egongo da. Informazio gehiago www.turismodebagoiena.com edo 943 79 64 63 telefonoan eskura daiteke.