Bergarako pazkoetan hasiko dira Debagoieneko V. Jardunaldi Gastronomikoak, pintxo banaketarekin

Gaur eguerdian izan da aurkezpen ekitaldia Debagoieneko Mankomunitatean, Arrasaten. Aurreko edizioetan bezalaxe, unean uneko produktuak erabiliko dituzte ekainean egingo diren jardunaldietan. Iker Basurkok eman digu edizio honetako berrikuntzen berri.

Jardunaldietan parte hartuko duten jatetxeen artean daude Arrasateko Hilarion, Bergarako Lasa, Leintz Gatzagako Soranetxea eta Oñatiko Etxe-Aundi, Goiko-Benta eta Arantzazuko Santutegia hotela.

Jardunaldiak hasteko, pintxoak

Ohiturari jarraituz, pintxo banaketa batekin egingo da jardunaldi horien aurkezpen herrikoia. Bergaran izango da oraingoan, pazkoetako jaien barruan, datorren martitzenean, maiatzak 25, 18:30ean, herriko plazan. Hemen ere, bakailao eta baratzeko produktuekin egindako pintxoak dastatu ahal izango dira.

Bisitaldiak

Gastronomiarekin zerikusia duten bisitaldiak ere egin ahalko dira ekainean zehar. Leintz Gatzagan Eugenio Otsoa gatz museoa, Arantzazun Gomiztegi kooperatiba edo Antzuolan Lapatza nekazaritza ekologikoko baserria bisitatzeko aukera izango da.

Bakailaoarekin eta baratzeko produktuekin Debagoieneko jardunaldi gastronomikoen bosgarren edizioa beraz, ekainaren 1etik 30era.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.