Zapatu eta domeka arratsaldean, gaztetxoz bete zen Amaia Antzokia. Giro polita egon zen bi egunetan, eta ume eta gazteak, astero bezala, zoriontsu. Kantatzen hasi aurretik gehienak urduri zeuden arren, amaitzerakoan sentitzen zuten alaitasunak merezi izan zuen.
Aramaioko hiru talde
Guztira, 36 taldek hartu zuten parte; horietatik gehienak arrasatearrak ziren arren, baziren hiru aramaiokoak, eta Legazpiko parte-hartzaile bat ere topatu genuen kortina atzean entseatzen.
8 eta 12 urte bitarteko umeek hartu zuten parte Arrasaten ere, eta argi dago izar txiki horiek talentu aparta dutela ondo pasatzeko eta kanturako, nahiz eta, batzuetan, mikroa piztuta duten ahaztu.
Karaoke ikuskizuna
Umeek argi daukate ez dela lehiaketa Kantari. Eta igartzen da, gainera, eurekin hitz eginez gero. Ez daukate lehiarako beldurrik, elkarri laguntzen diote eta, beste taldeen txanda izanda ere, beheko aulkitik bada ere, abesten ibiltzen dira, ondokoa animatuz.
Batek daki; akaso, Kantari-tik, izar handiak irtengo dira. Karaoke ikuskizunean kantuan hasi, eta imajinatu dezatela datorrena!