Arrasaten, Emakumeenganako Indarkerian Kontrako Plataforma dago, eta hark deituta egin zituzten mobilizazioak, Emakume asko falta dira: erailak izan dira, eta zuri bost axola? leloarekin. Atzo, domeka, egin zuten ekitaldi nagusia, elkarretaratzea, alegia, 19:00etan, plazan. Aurten, hainbat daturekiko arreta deitu zuten: besteak beste, Espainiako Gobernuak emandako indarkeriaren aurkako legeak dituen hutsuneetaz ohartarazi zuten.
Oñatin, Antzuolan, Aretxabaletan eta Bergaran ere egin zituzten elkarretaratzeak edo egun horrekin lotutako bestelako ekintzak ere.
Bilgune feminista
Bestalde, Arrasateko Bilgune Feministak ere balorazio bat egin du. Besteak beste, esan zuen "emakumeok maila guztietako erasoak pairatzen" dituztela, ez bakarrik tratu txarrak; eta egoera hori "diskriminazio historikoaren eta eskubide gabeziaren" ondoriotzat jo zuten, "jendartearen beraren izaera patriarkalarena, hain zuzen". "Emakumeen aurkako indarkeria emakumea kontrolpean edukitzeko modua izan da beti", diote. Horregatik, "indarkeriaren arazoa estrukturala da eta erantzunak, beraz, integrala izan behar du. Ez ditugu neurri penal eta asistentzialak bakarrik behar, emakumeon eskubideak eta betebeharrak aldarrikatu behar ditugu". "Bizi duguna denon arazoa dela ikusarazi behar diogu jendarteari", diote, azkenik.