Arrasateko Arizmendi ikastolan, esaterako, asteazkenean hasiko dira eskolak ematen goizez bakarrik; hilaren 15etik aurrera, berriz, goiz eta arratsaldez ibiliko dira lanean. Herri Eskolak egun bat lehenago, martitzenean ekingo dio ikasturte berriari, honek ere goizez bakarrik.
Oñatiko Herri Eskolako eta Elkar Hezi ikastetxeko neska-mutikoek martitzena izango dute ikasturte berriko lehen eguna. Bietan goizez arituko dira; herriko jaien ondotik, ohiko ordutegiari helduko diote: goizez eta arratsaldez, hain justu ere. Ikasturte berria irekitzeko martitzena aukeratu dute Aramaioko, Antzuolako eta Elgetako ikastetxeek ere.
Aretxabaletan eta Eskoriatzan eguaztenean hasiko dira eskolako martxa hartzen ikastolan, eta eguenean Herri Eskoletan.
Bailarako goiztiarrenak bergararrak izango dira: asteburu honetan oporrak bukatutzat eman eta astelehenean bertan ekingo diote berriz ere lanari.
Berrikuntzak ikasturte berrirako
Eta ikasturte berrirako berrikuntzak ere izango dituzte Dabagoieneko hezkuntza zentroetan, ikasle zein irakasleen konpetentziak ondoen garatzeko helburuarekin: euskara sustatzeko proiektuak, curriculum berriaren egoitzapena, espazioen berrantolaketa, eskola 2.0 eta ingelesezko barnetegien egitasmoak dira horietako batzuk. Bestetik, aipatzeko da aurten matrikulatutako ikasle kopurua igo edota matendu egin dela toki guztietan.