Danobat Taldeak Danobat Railway Systems ingeniaritza enpresa eratu du. Enpresa horren funtsezko jarduera trenaren errodadura sistema osatzen duten piezak fabrikatu eta mantentzeko ekipamendu eta linea automatikoak garatu eta merkaturatzea da.
Jarduera berri horrek ekarri du, alde batetik, ingeniaritzaren eragin handia duten fabrikazio lineak diseinatu eta ezartzeko gai diren pertsona kualifikatu ugari eurenganatzea; eta, bestetik, Bergaran 10.000 m2-tik gorako instalazio berri bat eraikitzea, linea horiek muntatzeko eta prest jartzeko.
50 milioiko eskaera
Danobatek 50 milioi eurotik gorako eskaera bat lortu du Errusiako salgai-bagoien lehen fabrikatzailea den TVSZ errusiar enpresaren eskutik.
Espainiako makina-erremintaren sektorean errekor historikoa jarri duen kontratu hori, treneko ardatz muntatuak fabrikatzeko linea erabat automatizatu eta malgu bat diseinatu eta eskaintzean datza. Linea 24 makinak osatzen dute, prozesu guztiak ordenagailuz kontrolatuta daude eta piezak manipulatzeko sistema bat du, gizakiaren esku hartzerik behar ez duena. Halaber, 17 makinak osaturiko 3 zelula robotizatu ere entregatuko dira, trenentzako bogie-ak fabrikatzeko erabiliko direnak.
Azken urteotan, Danobat Taldea eremukako espezializazio estrategia bat garatuz joan da, bere produktuak aeronautika, trenbidea, energia eolikoa, eta halako sektore zorrotzen beharretara egokituz. Hala, Danobaten bezeroen artean, enpresa hauek aipatuko ditugu: Rolls Royce, General Electric, Alstom, Siemens, Bombardier eta Gamesa.