Dagoeneko, turista ugari dabil Debagoienean eta ibarreko turismo bulegoek igarri dute hori. Atzo, esaterako, erdigune historikoa erakusteko hainbat bisita gidatu egin zituzten Bergaran, herrira hurbildutako hainbat turista talderekin.
Oñatin, berriz, unibertsitatea eta parrokia ezagutzeko ia bisita guztiak egin zituzten; eta espero baino lagun gehiago zebilela ikusita, unibertsitatea ezagutzeko aparteko saio bat eskaini behar izan zuten arratsaldean.
Datozen egunotarako ere, bisita gidatu gehiago izango dira bailarako turismo bulegoen eskutik, izan ere, "aurrez egindako erreserba asko dago jada". Oñatin, esaterako, Kataluniatik etorritako 80 lagun inguruko taldea izango da domekan.