Zoritxarrez, emakumeen aurkako indarkeria arazo unibertsala da, era guztietako mugak gainditzen dituena; kultura, gizarte eta maila ekonomiko guztietan ematen dena. Mexikon, Ciudad de Juarezen desagertu eta hildako emakume eta neska gazteen kasua, horren adibide askotako bat da.
Ehundaka emakume modu sistematikoan erailak izaten ari dira azken urteotan Ciudad de Juarezen; 4000 emakume hilak edota desagertuak azken 10 urtetan. Emakume horien egoera gertutik ezagutzeko, hildako bi emakume gazteren amen testigantzak entzuteko aukera izango dugu. 'Nuestras Hijas de Regreso a Casa' elkarteko kideak dira Julia Esther Cano eta Elia Escobedo.
Juliak 1995an galdu zuen bere alaba eta hiltzailea 2005ean atxilotu zuten. Bere alabaren sei seme-alaben kargu egin behar izan da. Eliaren alaba, berriz, orain dela 5 urte hil zuten, eta hiltzailea aske dago oraindik.
Urte asko daramatzate borrokan, eta borroka gogorra izan da oso. Baina poliki poliki ari dira ereindako hazien fruituak jasotzen. Azken urteetan biolentzia gutxiago dagoela aitortu digute.
Esperantza omen da galtzen den azkena, eta horixe da Julia eta Eliak daukatena. Orain gainera Estatuko gobernadore berriak babes handia eskaintzen diela-eta pozik daude. Azken hiru urte hauetan instituzioetatik jarrera oso baikorra aurkitu dutela azaldu dute.
Justizia eta errespetua eskatzen dute, emakumeekiko errespetua.
Hurrengo egunetan ibarreko herri guztietan hitzaldiak emango dituzte euren egoeraren berri emateko. Hitzaldiotan emakumeen eskubideen alde lan egiten duten hainbat adituk lagunduko diete.
Antzuola
Azaroak 8, arratsaldeko 19:00etan Olaran Etxean
Eskoriatza
Azaroak 13, 18:30ean, Kultura Etxean
Oñati
Azaroak 14, 19:00etan, Kultura Etxean
Aretxabaleta
Azaroak 15, 19:00etan, Kultura Etxean
Arrasate
Azaroak 16, 18:00etan, Ekineko lokalean
Azaroak 22, 19:00etan, Kultur Aten
Bergara
Azaroak 20, 19:00etan, Miguel Altuna Institutua
Leintz Gatzaga
Azaroak 21, 19:00etan, Kultura Etxean
Elgeta
Azaroak 23, 19:00etan, Espaloia Kafe Antzokian
Aramaio
Azaroak 28, 17:00etan, Kultura Etxean