Gaur ere ez dute zerbitzurik eman Eusko Jaurlaritzak kontraten bidez kudeatutako eskola jantokietan. Langileek %5eko soldata igoera, lanaldia handitzea eta langile bakoitzeko haur gutxiago izatea eskatzen dituzte, besteak beste. Bien bitartean, gurean ere, hainbat guraso egoerari aurre nola egin asmatu ezinik. Eskerrak, beste behin, aitona-amonei. "Arazo handiekin ibili gara", adierazi digu amona batek. "Guk hiru biloba ditugu eta senarrak eta biok zaintzen ditugu. Ni gaztearen bila etortzen naiz Bedoñabera. Senarra, aldiz, beste bien bila joaten da Erguinera". Beste ama batek honela esan digu: "Ba aiton-amonak joan behar izaten dute umeak jasotzera… norberak ahal duen moduan konpondu behar du… edo umeak hortik zehar".
Jantokiak hutsik
Gutxieneko zerbitzurik gabeko eguna izan da gaurkoa ere. Jangelak hutsik, amantalak bazter batean, eta koilara eta platerak txukun gordeta. Horrela aurkitu ditugu jantokiak gaur eguerdian ere. Akordio batetara iristen ez badira, abenduan beste greba bat egiteko prest agertu da langileen kolektiboa. Iaz bost egin zituzten.