Talde mahoneroa bihar, egubakoitza, estreinatuko da Soraluzeren kontra (18:00), eta gaurko eta biharko partiduetako irabazleek zapatuko finalean neurtuko dituzte indarrak, 18:00etan baita ere.
Arrasate Hiria, Mojategin
Domekan, berriz, Mondrak egingo ditu Arrasate Hiria txapelketan anfitrioi lanak. Urtero moduan, aurten ere Aloña eta Aretxabaleta dira talde gonbidatuak, eta 16:30ean hasita jokatuko dute hiruko torneoa. Kontuan hartu txapelketa Mojategin jokatuko dutela, Mondraren futbol zelai berrian –seguru batek baino gehiagok Atxabalperako bidea hartuko duela–. Futbol zaleek 6 euro ordaindu beharko dituzte (erretiratuek 3 euro, eta bazkideak doan). Eta, jakin baita ere, futbol zelairako sarrera Eroski ondoan dagoela, ez Musakolako kiroldegian.
Preferentea, datorren asteburuan
Irailaren 8an hasiko dute preferenteko txapelketa, eta lehenengo jardunaldi horretan, Josu Zubiaren mutilek bakarrik jokatuko dute etxean. Hala, Aloñak Ondarroako Aurrera taldearen bisita izango du. Aretxabaletari eta Mondrari dagokionez, Idiazabalen zelaian jokatuko du Mondrak, eta EHU Baskonia taldea izango du UDAK kontrario.