Horiek lasterketako izarrei begira hartutako denborak dira. Ibarreko izarrei begiratuta, 480 debagoiendar iritsi ziren helmugara. Guztien artean azkarrena Ritxar Fernandez oñatiarra izan zen (1:05:56). Bere marka onena 1:01:40 izan arren, oñatiarra gustura zegoen helmuga puntuan egindako lanarekin.
Bigarren debagoiendarra Jose Gabriel Urizar arrasatearra izan zen. Urizarrek 1:08:29ko denbora behar izan zuen helmuga puntuan. Hirugarren postuan, Asier Urdanpilleta oñatiarra sailkatu zen (1:09:19).
Aurreko postuetan ibili zen beste debagoiendar bat Imanol Molinero oñatiarra izan zen. Molinerok 1:11:37ko denbora behar izan zuen 20,2 kilometroak egiteko. "Oso gustura egin dut korrika; aurtengoa parte hartzen duda 12. aldia da eta inoiz baino denbora hobea egin dut". Ia lasterketa guztia Olano, Chaurreau eta beste hainbat txirrindulari ohiren ondoan ibili zen Molinero: "Baina, azkenean, eurak baino lehenago iritsi naiz".
Erreferentziekin, gaizki
Hain gustura geratu ez zirenak Mikel Alkorta eta Mari Fran Alonso arrasatearrak izan ziren. Alkortak 1:28:21eko denbora behar izan zuen lasterketa amaitzeko: "Gura nuena baino denbora gehiago behar izan dut; eskas ibili naiz", adierazi zuen amaieran. Lasterketari dagokionez, "Beti bezala oso giro polita egon da; hori da lasterketa honek duena, giro herrikoia", gaineratu zuen Alkortak. Mari Fran Alonsok ere uste baino denbora gehiago behar izan zuen (1:32:12). "Horrenbeste lagunen artean, lekua hartzea zaila izan da. Gainera, beste urte batzuetan baino zerbait luzeagoa izan da lasterketa. Hala, erreferentziekin gaizki ibili naiz", esan zuen Alonsok. Atleta arrasatearraren ustez, lasterketa egiteko helburua aldatu egin behar da: "Giroaz gozatzeko lasterketa da, ez denbora egitekoa", azaldu zuen.