Barbara Hendricks soprano ezaguna, emakume solidarioa, konprometitua eta natura zale handia da. Haren iritziz, bilaketa espiritualean dago bizitzaren zentzua. Bizitza filosofia horrek baditu antzekotasunak Arantzazuren izaerarekin berarekin, bakearen eta espiritualtasunaren bilaketarekin.
Hendricks-ek gainera, Asturiasko Printzea saria eskuratu zuen giza eskubideen alde egindako lanagatik. Kontzertua arratsaldeko 19:30ean izango da, bihar, Arantzazun, Jorge Oteiza eskultoreari egingo dioten omenaldiaren baitan. Sarrerak guztiak dagoeneko agortuta daude.
Omenaldia Oteizaren jaiotzaren lehen mendeurrena dela-eta egingo dute Arantzazun, kokaleku horrek zuzeneko lotura du eta Orioko artistarekin.
Omenaldia arratsaldeko 6retan hasiko da, Juan Antonio Urbeltz koreografoak eskainiko duen Apostoluen dantzarekin. Ondoren Oñatz dantza taldeak emanaldia egingo du eta ostean Andoni Egaña bertsolariak abestuko du. Omenaldiaren ostean, Barbara Hendricks-en kontzertua hasiko da. Soprano estatubatuarrak Love Derwinger piano jotzailea izango du lagun eta Aaron Copland, Gustav Mahler , Francis Poulenc eta Richard Straussen lanak interpretatuko dituzte.