Fernandezek azaldu zuen hezkuntza-arloko langileei ez ezik, gurasoei eta bizitzaren, bizikidetzaren eta hezkuntzaren inguruan kezka eta gizarte-balore berriak bultzatzeko nahia duten pertsonei zuzenduta dagoela; baita giza arloa jorratzen duten ikasleei eta langileei ere. Baketikeko zuzendariaren esanetan, "geure burua eta besteak pertsona izaten hezteko baliabide teorikoak eta praktikoak eskaintzea da bere helburua".
Zortzi bizipen-ikaskuntza
Pertsona izaten hezteko, Batetikek martxan jarriko duen proposamenak zortzi bizipen-ikaskuntza lantzen ditu: gizakiaren izaera mugatua, esker onaren zentzua, kontzientziari erantzutea, giza duintasunaren esanahia, elkarrizketaren plusa, enpatiaren plusa, pazientziaren plusa eta maitasunaren ikaskuntza.
Zapatuko aurkezpenaren ondotik, apirilaren amaieran proposamen horren esparru teorikoa jasotzen duen Pertsona izaten hezi. Zortzi ikaskuntza izeneko liburua argitaratuko dute. Jarraian, maiatzaren 8an, prestakuntza ikastaroa eskainiko dute horren harira. Fernandezen esanetan, "asmoa da hezitzaileen, familien eta lagunen sarea sortzea, koordinatzeko eta datorren ikasturtean horrekin praktikatzen hasteko".