Greba deialdia egin duten sindikatuek, aurrez eskatzen zituzten baldintzez gain, oraingoan Hezkuntza Sailburu Tontxu Camposen dimisioa ere eskatu dute.
CCOO sindikatua izan da grebarako deialdirik egin ez duen sindikatu bakarra. Joan den astean Hezkuntza Sailarekin akordio batera iritsi zirela eta. Gainontzeko sindikatuek gogor kritikatu dute akordio hau eta ez dutela aintzat hartzen azaldu dute.
Datu ezberdinak
Aurreko astean gertatu zen bezala oraingoan ere sindikatuek eta Hezkuntza Sailak emandako datuak bestelakoak dira. Sindikatuek diote jarraipena %65ekoa izan dela, eta Tontxu Camposek gidatzen duen administrazio sailaren hitzetan, ordea, %58,8koa izan da.
Ibarrean gehiago
Gure ibarrean, joan den astean baino ikastetxe gehiagok egin dute greba.
- Arrasaten institutuak izan ezik gainontzeko ikastetxe guztiek greba egin dute.
- Aretxabaletan, Aramaion, Antzuolan eta Oñatin greba egin dute ikastetxe guztiek.
- Bergaran, Ipintza institutuan ez da eskolarik egon, ezta San Martin eskolan ere eta Miguel Altuna institutuan, bestetik, 53 irakasletik 8k egin dute greba.
- Elgetan, 10 irakasletik 2k egin dute greba eta ikasleak eskolara joan dira gaur.
- Eskoriatzako Pausoka haur eskolan ere ez da grebarik egon.