Lorpen batzuk
Zortzi urte dira Deba Garaiko aurre jubilatu eta pentsionisten elkarteak euren eskubideak aldarrikatzen lanean diharduela. Izan ere, oso pentsio urriak jasotzen dituzte bai alargunek eta baita aurre jubilatuek ere. Zortzi urte hauetako ibilbidean izan dituzte lorpen batzuk, besteak beste, alargunen pentsio minimoak gizonaren pentsioaren %52ra igotzea lortu dute, lehen %45a kobratzen zutenean.
Pentsio baxuak alargunek
Hala eta guztiz ere, alargunek oso pentsio baxuak jasotzen dituztela salatu du APPALDEko presidente Felipe Antonio Igartuak.Elkarteak lanean dihardu alargunen pentsioak senarraren pentsioaren %70a izatera heldu arte. Izan ere, Kontsumorako Prezioen Indizearekin batera igotzen dira alargunen pentsioak ere, baina bizi mailak gehiago egiten duela gora azpimarratu dute.
Aurre jubilatuak
Aurre jubilatuen egoera ere ez da hobea eta, diotenez, esparru honetan ez dute orain artean ezer lortu. Hala, egun aurre jubilatuek kotizatutakoaren %60a irabazten dute eta %100 kobratzea aldarrikatzen dute, euren eskubidea delako. Espainiako gobernutik euren pentsioetan gorakada bat agindu badiete ere, ez dela oraindik gauzatu salatu dute.
Bazkide ugari
APPALDEk, 140 bazkide inguru ditu eta gehienak oñatiarrak dira. Batzar orokorrean urteko balantzea egin dute eta alargunen eta aurre jubilatuen pentsio eskubideen alde lanean jarraitzeko gogoa berretsi dute.