Eitb.com agerkaria ari da jarraitzen atentatua. Horrela titulatu dute eta handik jaso dugu notizia hemen jartzeko:
ETAk bonba-auto bat zartarazi du EITBren Bilboko egoitzan
ETAren izenean deitu duen lagunak abisatu bezala goizeko hamaikak
pasatxo zirela lehertu da EITBren Bilboko egoitzaren atzealdean
jarritako bonba-autoa, Citroen Jumpy furgoneta bat. Ordurako, EAEko
irrati eta telebista publikoaren egoitza nagusia, Termibus autobus
geltokia eta ondoko beste zenbait bulego -Bizkaiko Ogasunarena, 'El
Mundo' eta 'Deia' egunkarienak, Antena 3ena eta Onda Cerorena- hustu
egin ditu Ertzaintzak, eta San Mames atzealderaino joanarazi ditu
langileak. Lekukoen arabera, eztanda handia izan da, kalte handiak
eragin ditu EITBren egoitzan, baina inor ez du zauritu. Fatxada
kristalezkoa denez oso hondatuta dagoela diote. Halaber, urduritasun
une handiak bizi izan direla.
Bilboko eremu horretan jende asko ibiltzen da ohikotan, eta gaur
goizean erdi jaieguna izanik, are eta gehiago. Ondorioz, nahasmen
handia sortu da. Besteak beste, Termibus autobus geltokia hustu egin
dute, eta 12:30 inguru arte ezin izan dute berriro zerbitzua ematen
hasi. Zerbitzu etete horrek endredo handiak sortu dizkie herritar
askori, haien autobusak atzerapen handiz atera baitira.
Goizeko hamarrak inguruan ETAren izenean ari zela esan duen lagun baten
deia jaso dute Bilboko suhiltzaileek. Hamaiketan EITBren egoitzan
lehergaiz betetako furgoneta zartatuko zela ohartarazi du. Halaber,
Arrigorriagako (Bizkaia) mendi batean zegoela furgonetaren jabea,
arbola bati lotuta. Gizonezko hori esandako lekuan aurkitu dute
ertzainek.
EITBko langileak eta ondoko bulegoetakoak egoitzetatik aterararazten
hamarrak eta laurden inguruan hasi da Ertzaintza, eta presa handiz
irtenarazi ditu. Lehendabizi kanpoaldean geratu dira, baina gero asko
urrunarazi dituzte: San Mames atzealdean edo Injenieritza eskola ondoan
babesteko eskatu diete, eta EITBren egoitzaren inguru guztia eremu
zabal batean hesitu dute. Ondoko eraikinetako bizilagunei leihoak eta
pertsianak ixteko eskatu die Ertzaintzak.
Leherketa gertatu baino lehenago aurkitu dute bonba-autoa ertzainek,
baina indargabetzeko aukerarik ez dute izan artezilariek, eta esan
bezala, lehertu egin da.
Bingen Zupiria: ''EITBk askatasunarekin eta informazioarekin duen konpromiso etikoarekin jarraituko du'' ETBko zuzendariak atentatua gaitzetsi du eta kaltetu guztiei adierazi die elkartasuna. Adierazpenak.
Goienako zuzendaritzak ere oharra atera du:
Gertakarion aurrean Zuzendaritza batzordearen oharra:
Adierazpen askatasunaren eta
euskararen aurkako erasoa
Goiena Komunikazio Zerbitzuak Kooperatiba Elkarteko Zuzendaritza Batzordeak elkartasuna adierazi nahi die EITB taldeari eta talde horretako langileei.
Goienako zuzendaritzak gaitzetsi egiten du, EITBk Bilbon duen egoitzaren aurkako eraso basati eta justifikatu ezina, adierazpen askatasunaren eta euskararen aurkako erasoa delako.
Goiena Komunikazio Zerbitzuak Kooperatiba Elkarteko Zuzendaritza Batzordea