Dagoeneko hasi dute banaketa eta hilaren 30erako Eibarren banatuko dituzte 10500 ale. San Andres azoka berezirako gura dute banatzea Landa Garapenerako elkarteek. Lau orrikoaren helburua da, baserriko produktuen eta azoka berezien gaineko informazioa ematea. Era berean, sasoian sasoiko produktuen zerrenda ere badu Deba Garaia eta Debemen elkarteek argitaratutako gidak. Poltsikoko formatua du eta erabiltzeko erraza da.
Euskaraz eta gaztelaniaz jaso dute informazio guztia, diseinu moderno eta garbiaz. Azken finean, Deba Garaia eta Debemen elkartekoen asmoa da, debagoiendarrek erabiltzea esku orria. Guztira 50 mila ale argitaratu dituzte eta horietatik gehienak postontziz postontzi banatuko dituzte eta gainerakoak azoka berezietan eta asterokoetan.
'Debarroa; menditik itsasora' kanpainaren barruan banatuko dituzte gidak. Beti ere, baserri inguruarekiko sentsibilizazioa bultzatu gura dute Deba Garaia eta Debemen elkarteek.