Aretxabaletak 0-2 irabazi eta lehenengo jarraitzen du

Etxetik kanpo jokatu dute preferente mailako hiru taldeek aste bukaeran, eta Aretxabaletak bakarrik lortu du garaipena (0-2). Mondrak eta Aloñak, biek galdu egin dute.

Lehen postuan jarraitzen du Aretxabaletak 49 punturekin eta gainera, Hernani atzean uztea lortu du –orain arte berdinduta egon dira–. Zumaiakori 0-2 irabazi zion zapatuan eta Gordobil eta Arenazaren mutilak gustura itzuli ziren etxera. Pazientzia izan zela partiduko gakoa adierazi digu Arenazak: "Bagenekien zelai zaila izango zela Zumaiakoa, txikia delako, baina atzean lasai egotea lortu dugu eta pazientziarekin iritsi dira golak". Bigarren zatian sartu zituzten gol biak: lehena, 52. minutuan Aritz Igartuak eta bigarrena, partidua bukatzeko 10 minutu geratzen zirenean Akaitz Garaik.

Mondra eta Aloña ezinean

Mondrak galdu egin zuen Real Unionen aurka (3-1). Arrasateko mutilak euren lekua topatu ezinik ibili ziren zelaian eta lehenengo ordu erdirako 3-0 galtzen zeuden. Mondraren gola lehen zatia bukatu aurretik iritsi zen eta bigarren zatian arrasatearrak izan ziren nagusi baina golik ezin izan zuten lortu.

Oñatiri ere galtzea tokatu zitzaion UPV/EHU Vasconiarekin (2-1). Iñigo Arrola oñatiarrak zabaldu zuen markagailua bigarren zatian, baina segituan ailegatu zen berdinketa. Eta partidua bukatzekotan zegoela UPVren bigarren gola etorri zen oñatiarren akats bat aprobetxatuta.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.