Gonzalezek bere txostenean dioenez, "Bergarako ugaztunen kontserbaziorako arrisku faktore nagusiak ageri dira: alde batetik, sare hidrografikoaren zatirik handienak ura kutsatuta eta ur-ibilguak zein ur-bazterrak eraldatuta dauzka". Hortik abiatuta, ibaia eta bere ingurua kudeatzeko proposamen batzuk egiten ditu adituak, eta horiek Debagoien osora zabal daitezke, kasu batzuetan.
Oraindik Debako araztegi sarea osatuta ez badago ere, biologo horren esanetan, "ibaiak hobera egin du, eta jendeak igartzen du hori". Baita animaliek ere, eta ibaiak hobera egin duela erakusten dute han bizi diren ahateek eta arrainek. Ahateak bereziki ugariak dira Bergaran, eta hango ibai ondoko auzoetan arazotxoak ere sortzen dituzte.
Ibaiaren gaur egungo egoeraren, haren faunaren eta ibaia zaintzeko proposamenen berri jasoko du Goienkariak bere biharko zenbakian. Jorge Gonzalezekin elkarrizketa ere argitaratuko du.