Emakumezkoen elite mailako txapela, Leire Aranbarrirendako izan zen. Oso gustura azaldu zen 24 urteko azpeitiarra egindako lanarekin. "Nahiko urduri egon naiz hasieran, baina nerbioak kontrolatu ditut eta egindako lanarekin pozik nago. Gogorrak izan dira boulderrak". Aranbarrik, orain txapelarekin eta eskaladarekin disfrutatzen jarraituko duela gaineratu digu eta txapelketaren bat badago, bertan parte-hartzeko asmoa ere azaldu du.
Gizonezkoen elite mailako txapela, Mikel Odriozola eskalatzailearendako izan zen. 26 urteko zestoarrak bere burua ondo ikusi du txapelketan eta aurkariak oso indartsu. "Egindako pausu guztietan lehenengo pegeak ongi egin ditut eta hori izan da giltza. Azkenekorako ordea, nekatuta eta indargabe nengoen. Aurkariak ere indartsu ikusi ditut, baina azken boulderra ez du inork egiterik izan. Pegetara erabaki zen Euskal Herriko txapelketa, "egindako blokeak ondo irakurrita egin ditut eta indarrarekin hasi ditut. Saiakera guztiak ongi atera zaizkit".
Harrobi bikaina
Mikel Castillo antolatzaileak balorazio oso positiboa egin du. "Lortutako emaitzekin eta jendearen erantzunarekin oso pozik gaude. Euskal Herriko eskalatzaile onenak izan dira Uarkapen. Hemengo harrobia oso ona da". Guztira, 92 eskalatzailek hartu du parte. Euskal Herriko txapelketan, 21 eskalatzaile lehiatu ziren.
Harrobi bikainaren eredua, Mikel Velasko arrasatearra da. Datorren urtean, Velasko gaztea, elite mailan arituko da. "Oso ondo ikusi dut nire burua nahiz eta bigarren postuan geratu 20 urtez azpikoen mailan. Txapelketan maila ezin hobea izan da, baina, indarra eta erresistentzia ezinbestekoa dira aurrera egiteko". Kategoria berrian, gogor egin beharko duela lan gaineratu du Velaskok.
Datorren urtean, Santamasetako boulder txapelketa ere egiteko asmoa dutela kontatu zigun Castillok, dena den urte berrian zehar zehaztuko dute aurtengo harrera bikaina ikusita. Izan ere, Euskal Herriko Txapelketako Federazioaren helburua da, herriz herri antolatzea txapelketak.
Sailkapena mailaz-maila
Elite neskak
1. Leire Aranbarri
Elite mutilak
1.Mikel Odriozola
20 urtez azpiko neskak
1.Itziar Zabala
20 urtez azpiko mutilak
1.Haritz Dominguez
Herrikoia mutilak
1.Xabier Derteano