Rebeka Ubera Gipuzkoako batzarkideak Aretxabaletan eman duen prentsaurrekoan azaldu duenez, Foru Aldundiak 2008rako gertatu dituen aurrekontuak negoziatzen hasi zirenean, Aralarrek bi ildo garatu nahi izan zituen: batetik politika sozialean eta beste hainbat arlotan aldaketa nabarmenak eragingo dituzten bideak jorratzea, eta bestetik erakunde eta gizartearen arteko zubi izan zitezkeen diru lerroak ezartzea. Emaitza ikusita Uberak azaldu du helburua lortu dutela, 35 milioi euroko kopuruari eragiten dioten 40 zuzenketa aurkeztu dituztela esanaz.
Politika sozialean, kiroletan, euskaran, emakumeen berdintasunari dagokionean, ingurumen eta zabor kudeaketan eta nekazaritza eta abeltzantzan eragingo duten hainbat ekarpen zerrendatu dituzte.
Garraioari dagokionean, azpimarratu dute Aralarrek aurkeztutako Garraio Plana ia osotasunean geratu dela txertatuta aurrekontuen proiektuan, eta gaineratu dute hor sartzen direla txartel bateratuarekin lortzen diren deskontuak eta baita beste hainbat osagarri ere.