Lurreko Telebista Digitala ikusteko 52. kanalean aurkituko dute ikusleek Goiena Telebista. Sintonizazio probak egin eta aurkitzeko zailtasunak izanez gero, tekniko batekin jarri behar da harremanetan, antenan beharrezko egokitzapenak egin eta arazoa konpontzeko. Edozein zalantza argitzeko, gainera, Goiena.net-en horretarako bereziki prestatutako atal bat dago.
Arrasate, Aretxabaleta, Eskoriatza, Leintz Gatzaga, Oñati, Elgeta eta Bergararen ostean, Goiena Telebistak digitalera salto egiten duen zortzigarren herria da Antzuola. GOITB lurreko telebista digital bidez ikusten ez duen herri bakarra geratzen da, beraz, orain: Aramaio. Bertara seinale digitala zabaltzeko lanean dabiltza teknikoak. Gutxi barru, beraz, datorren astean bertan, seguruenik, Debagoiena osoan ikusi ahalko da Goiena Telebista lurreko seinale digitalaren bidez.