Bi mila euro. Maiatzetik hona kopuru hori deskontatzea posiblea izan da auto berria erosterakoan. Baldintza konkretu batzuk betez gero Madrilgo gobernuak 500 eurorekin, Eusko Jaurlaritzak beste 500 eurorekin eta markak berak mila eurorekin diruz lagundu ditu salmentak. Ba, laster amaituko da pagotxa.
"Egia da dirulaguntzekin hasi ginenetik salmentak igo egin direla. Orain, albistea laguntza horiek desagertzear daudela denean, berriz sortu da mugimendua". Ford Mugarriko Rafa Etxaberen hitzak dira. Ez d zalantzarik. Dirulaguntzak kentzearekin bat jaitsiko dira atzera ere salmentak. "Otsaila eta martxoa izan ziren hilabete txarrenak. Nik uste dirulaguntzak kendutakoan laster itzuliko garela egoera horretara".
Prozesu kaotikoa saltzaileendako
Dirulaguntzak amaitu egingo dira agortzear daudelako erakundeek automobilaren sektorerako emandako fondoak. Salmentak areagotu egin dira denbora honetan, baina guztia ez da positiboa izan Rafa Etxaberen esanetan. "Denbora honetan guk, saltzaileek, bi mila euro aurreratu behar izan ditugu salmenta operazio bakoitzeko. Gero eta gehiago saldu, gero eta gehiago aurreratu behar izan dugu, eta aurreratutakoa hiru erakunde ezberdinetatik kobratzea ez da lan erraza. Txostenak bete, erantzunaren zain egon, argitu beharreko zalantzak argitu… Prozesua kaotiko xamarra izan da".