19 auto elkartu ziren erakustaldian, baina autoetako batek arazoak izan zituen eta ezin izan zuen proba egin. Erakustaldia erakargarriagoa egiteko sariak banatu zituzten, eta Oñatiko Alvaro Vazquez nagusitu zen Suzuki Samurai autoarekin. Bigarrena Irungo Iñigo Alzuarai izan zen, hau ere Suzuki Samurai autoarekin eta hirugarrena Ibon Aranburuzabala eskoriatzarra, Patrolarekin.
Orain arte Eskoriatzan egin izan dituzte 4x4 erakustaldiak, azkena irailean bertan. Baina elgetarrak probaren bat antolatzeko gogoz zeuden, eta Kanpanzarren –Bergarako lurretan– egitea pentsatu zuten. Lurra sikatuta zegoenez azken egunotako giro epelagatik kamioiarekin ekarri zuten ura: "Lokatza sortu dugu eta horrek beti egiten du ikusgarriagoa proba. Uste dut ikusleak oso entretenituta egon direla", jakinarazi ziguten antolatzaileek. Gainera, aparteko ezusteko barik burutu zen.
Gure ibarrean 4x4 autoen zaletasun handia dago, eta horregatik antolatzen dituzte erakustaldiok. Antolatzaileek hurrengoa Arrasaten egitea gurako lukete, baina oraindik datarik ez dute zehaztuta.