Euskalmeten arabera, gaur metro karratuko 60 litro jasotzea espero dute. Horrez gainera, eguraldi petrala izango dugu, izan ere, zaparrada txikiak eta ertainak botako ditu eta trumoi-ekaitzak izango dira.
Bihar, berriz, metro karratuko 80 litro ur espero dituzte. Biharko kasuan zaparradak indartsuak izan daitezke eta egunean zehar etengabe egin dezake euria eta ekaitz zakarrak izateko arriskua ere aurreikusita dago.
Udazkeneko eguraldi honen arrazoiak dira batetik, haize hotza dakarren aire-masa guregana iritsi dela, eta horrek ezegonkortasuna eragingo duela. Bestetik, Mediterraneoan kokatu den depresio batek hezetasuna ekarriko duela biharko. Eta azkenik, itsasotik etorriko zaigun ipar haizeak hezetasun handiagoa ekarriko digula.
Argiak eta segurtasuna
Egoera ikusita, Herrizaingo Sailak hainbat gomendio bidali ditu datozen egunotarako. Esaterako, errepidean ibiltzeko, kontuan hartuta euri zaparrada indartsuak izango direla, gomendatzen dute argi laburrak, edo beharrezkoa bada, lainoetako argiak erabiltzea, ikuspena nabarmen gutxitzen delako.
Abiadura gutxitzeko eta gogor ez frenatzeko gomendioa ere egin du, baita aurreko ibilgailuarekiko distantzia nabarmen handitzeko ere. Ur puztu handiak daudenean, berriz, abiadura moteltzeko eta putzua pasatu ostean frenoak ondo dabiltzan egiaztatzeko gomendatu du.