Horren ondorioz, Aldundiak udalei egingo dien ekarpena 404,4 milioikoa izango da; eta ez hasieran aurreikusitako 458,74 milioikoa, hain zuzen ere. Hala, %11,84ko jaitsiera izan du ekarpen horrek.
Egubakoitzean Gipuzkoako ahaldun nagusi Markel Olanok eta Ogasun diputatu Pello Gonzalezek azaldu zuten 2007rekin alderatuta 2008ko zergen likidazioa %7,6 txikiagoa izan zela. Hala ere, BEZari egin dizkioten egokitzapenekin %5,46koa izango da jaitsiera.
Dirua itzultzeko, bi urte
Hortaz, aurretik Aldundiak aurreratutako diruaren zati bat itzuli beharko dute udalek. Are gehiago, urrian Aldundiak udalei ohartarazi zien 37 bat milioi itzuli behar izango zituztela, baina, azkenean, kopurua askoz handiagoa da.
Horrekin batera, egubakoitzean, diputatuen batzarrak erabaki zuen udalek itzulketa egiteko bi urte izatea, eta kopuru horri inongo interesik ez gehitzea.