Gasolina usaina, motor hotsa eta jendearen berotasuna izan zen zapatu arratsaldeko gidoia Gatzagako XIV. igoeran. 22 urte antolatu gabe zegoen igoera hau, eta lasterketaren itzulera arrakastatsua izan zen. Denetara 46 partaide irten ziren irteera puntutik, 12 debagoiendar, eta bik ez zituzten bi txandak amaitu.
Lasterketan denbora onena Aitor Zabaletak egin zuen, 00:02:41. Haren atzetik sartu zen Angela Vilariño lau segundo gehiagorekin. Podiumeko maila apalenera igo zen bestetik Pantxo Egozkue, Zabaletarengandik zazpi segundotara.
Lehen bi postuetan zeintzuk egon zitezkeen aurreikus zitekeen arren, Silver Car-en artean lehia estua egon zen, hirugarren postua lortzeko. Pantxo Egozkue, Alberto Alonso eta Aritz Egozkuek txanda bakoitzean ehuneneko aldeak besterik ez zituzten elkarren artean.
Ibilbide motza
22 urteko hutsunearen ondoren, erantzun ona izan du Gatzagako igoerak, eta antolatzaileak ere oso gustura agertu ziren lasterketa amaitutakoan. “Jendearen erantzuna oso ona izan da, bide bazterrean ikusle ugari baitzeuden” dio Xabier Oñederra antolatzaileak. “Eguraldiak ere lagundu digu, eta ez da nabarmentzeko istripurik egon” zehaztu du.
Hala ere, hasieran pentsatutakoa baino ibilbide laburragoa izan da Gatzagakoa. Gaztanaduitik Marulanda arteko errepidearen egoera eskasa zen, eta ibilgailu batzuentzako ez zen batere egokia. Eta horixe bera izan da pilotu gehienek erakutsi duten kexa.
Rafa Diazek 80 hamarkadan behin baino gehiagotan hartu zuen parte Gatzagako igoeran, eta “behetik irteten ginenean politagoa zen. Azkarragoa zen askoz ere, lautadako tarte guzti horretan bizi-bizi joateko aukera ematen baitzuen” oroitzen du.
Hala ere, pilotuek eta ikusleek gehiago gozatzeko aukera eduki dezaten, hurrengo urtean igoera Arlabanen egiteko asmoa daukate antolatzaileek. Zapatuko igoerak 2,6 kilometroko luzera baldin bazuen, Arlabanekoak 6,5 izango lituzke. “Edizio honetan ere hemen egin nahi genuen igoera, baina ez ditugu baimenak lortu” dio Oñederrak.
Errepidearen egoera
Errepidearen egoera ere hizpide zeukaten gidariek. “Igoera ederra dauka amaiera aldean”, dio Jose Migel Gabilondok. Manuel Evanjelistak dioenez, gaur egun errepidea askoz ere hobeto dago orain dela 22 urte baino. “Asko zabaldu dute bidea, eta asfaltoa ere askoz ere egokiagoa da”.
Hala ere, aurkako iritzidun gidariak ere bazeuden. Ruben Nogeirasen iritziz “ibilbideak zulo asko zeuzkan. Okerren zegoen zatia landa-turismoaren ondorengoa zen; apur bat arriskutsua ere bazegoen”. Aitor Zabaleta garaileak ere “asfalto kapa baten beharra” igarri dio errepideari “gure automobilentzako nekeza da egoera horietako bideetan ibiltzea”.
Antolatzaileen hitzetan, ostera, “errepidea ez zen erabat ondo egongo, baina gaizki ere ez zegoen”. Hortaz, hemen ere gustu guztietarako iritziak.
Lasterketako sailkapena
Aitor Zabaleta 00:02:41
Angela Vilariño 00:02:45
Pantxo Egozkue 00:02:48
Alberto Alonso 00:02:49
Aritz Egozkue 00:02:50
Ruben Nogueiras 00:02:52
Imanol Lakar 00:03:02
Aitor Ramirez 00:03:04
Joseph Duperou 00:03:09
Iñaki Alberdi 00:03:13
Iban Tarsicio 00:03:13
Asier Mugarza 00:03:17
Ion Etxeberria 00:03:18
David Ardions 00:03:19
Antonio Evanjelista 00:03:23
Ricardo Echave 00:03:24
Sergei Biteri 00:03:24
Andoni Mugarza 00:03:25
Jose Antonio Insausti 00:03:26
Imanol Oskoz 00:03:26
Jose Miguel Gabilondo 00:03:26
Joseba Garcia 00:03:28
Jose Mitxelena 00:03:30
Miguel Otegi 00:03:32
Asier Samiego 00:03:32
Robert Garcia 00:03:33
Ion Zalloetxeberria 00:03:35
Rafa Diaz 00:03:39
Egoitz Gorostiaga 00:03:41
David Zambrano 00:03:42
Iñaki Racamonte 00:03:42
Gorka Idigoras 00:03:45
Jesus de la Fuente 00:03:47
Oliver Lopez 00:03:49
Joseba Frutos 00:03:53
Sergio Porcel 00:03:57
Jose Mari Ubieta 00:04:03
Iker Bilbao 00:04:06
Amets Salvatierra 00:04:19
David Delgado 00:04:55
Gotzon Gonzalez 00:07:25
*Bi pilotu erretiratu egin ziren. Hasieran beste bi pilotuk izena emana bazuten ere, ez ziren irteeran egon.