Ainhoa Agirreazaldegik Leitzan jardun zuen final laurdenetan eta 634 puntu eskuratu. saio bakoitzeko lehenak zuzenean egin du aurrera, gainontzekoek puntuazioari begiratuta. Horren arabera, eta saio guztiak jokatuta sailkapenean hamargarren tokian zen Agirreazaldegi eta hamaikak egin dute aurrera.
Azaroaren 14an, Tolosako Usabal Kiroldegian jokatuko du Ainhoak finalaurrekoa eta kantu lagun izango ditu: Igor Elortza, Sustrai Colina, Iker Zubeldia, Uxue Alberdi eta Iñaki Gurrutxaga.
Lehen finalerdia
Tolosakoa baino lehen beste bi finalerdi jokatuko dira Bergaran eta Gasteizen. Bergarakoa azaroaren 7an izango da Udal Pilotalekuan eta honako bertsolariek jardungo dute: Aitor Mendiluzek, Maialen Lujanbiok, Etxahun Lekuek, Beñat Gaztelumendik, Fredi Paiak eta Jon Martinek.
Saio guztiak 17:30ean hasiko dira.
Sarrerak
Bertsolari Txapelketa Nagusirako saioetako sarrerak, aurrez erostekoan, internet bidez bakarrik eros daitezke: www.bertsosarrerak.eu atarian. Saioa hasi orduko, eta egunean bertan, ohikoa izaten denez, txarteldegian ere salgai ipiniko dira sarrera batzuk.
Finalaurrekoetarako sarrera arruntek 12 euro balio dute; Bertso Zale Elkarteko bazkide izanez gero, sei euro; eta 16 urtera artekoen sarrerek lau euro.
Bertsozale Elkartetik eta Txapelketa Nagusiaren antolaketa taldetik dei berezia egin dute sarrera internetez erosi edo sarrera-bonoak dituzten bertso zaleei saioetara garaiz joateko. Izan ere, orain arteko saioren batean izan da aforo arazorik eta bertso zaleen erosotasuna eta antolatzaileen erraztasuna bermatzea dira helburua.