Orain arte 62 herritan izan dira egitasmoaren bultzatzaileak elkarrizketatuak bilatzen. Tartean, Debagoieneko herri guztiak. Dagoeneko mila bat euskaldunekin izan dira. Horietatik 388 debagoiendarrak dira.
Adinekoen elkarrizketak
Euskal Herriko Ahotsak Deba ibarreko Badihardugu euskara elkartearen proiektua da. Esan bezala, Euskal Herriko adineko euskaldunak elkarrizketatu eta euren euskara eta bizipenak jaso eta Internet bidez zabaltzea du helburu.
Egitasmo horrek urteak ditu. 2002an oinarriak zehaztu zituzten eta ondorengo hiru urteetan, lehendik eginda zeuden elkarrizketa zaharrak lantzen eta grabazio berriak egiten ibili ziren. Ordutik hona Interneteko webgunea osatzen jardun dute bultzatzaileek.
Debagoienak, berezitasunak
Gainontzeko eskualdeekin alderatuta, Debagoienak hainbat berezitasun dituela aipatu du Ahotsakeko bultzatzaile Aintzane Agirrebeñak. Kooperatibismoak duen eragina aipatu du, besteak beste.
Orain arte material asko bildu badute ere, oraindik zeregina dagoela egiteke azpimarratu du.
Proiektu irekia
Bestalde, elkarrizketatuak topatzeko, herri bakoitzeko Udalarekin harremanetan jarri izan direla jakinarazi du Agirrebeñak. Horren harira, gogoratu du proiektu irekia dela eta beraz gura duenak parte har dezakeela.