Ekitaldian egon zen, besteak beste, Gema Zabaleta Eusko jaurlaritzako Enplegu eta Gizarte Gaietako sailburua. Zabaletarekin egon ziren baita ere, Jonan Fernanez Baketikeko zuzendaria eta egunotan Arantzazun ariko diren hizlariak ere.
Bi alde izango ditu Afrikako aste honek: batetik, 18:00etatik 20:00etara Laku Handietako berradiskidetzeari buruz egingo den ikastaroa; eta bestetik, Afrikandugu proposamenaren lanketa. Afrikandugu proiektuan, Euskal Herriko hainbat erakundetako ordezkariek eta Afrikako bertako ordezkariek elkarlanean jardungo dute, kooperazioan noraino berriztatu daitekeen aztertzen.
Inaugurazio ekitaldian zehar, Gema Zabaletak adierazi zuen herrialde garatuek zorra dutela Afrikarekin, eta Eusko Jaurlaritzak Afrikaren giza garapenerako duen borondate politikoa berretsi zuen. Sailburuaren esanetan, aurten Euskadi eta Afrikaren arteko elkarlanerako 72 proiektu lagunduko dituzte, eta kontinente zaharreko kulturak gure gizartean izan ditzakeen onurak ere goraipatu zituen.
Ez nagusitasunaren erotika, ez biktimismoaren erotika da aurtengo jardunaldien leloa, eta Jonan Fernandezek azaldu zuenez nazioarteko laguntzek Afrikan eragiten duten dependentzien inguruan lan egingo dute.