Lakuntza ez, Idoiaga bai
Victoriano Gallastegi bezala, aurkeztuko ez dena da Arrasateko alkatea, Inazio Lakuntza. Agintaldi hau eman du alkatetzan eta gorabeheratsua izaten ari da, eskandalu urbanistiko eta guzti. Arrasateko EAJk oraindik ez du erabaki zein hautagai aurkeztu hauteskundeetara. Prozesu horretan murgilduta daude, baina urtarrilera arte-edo ez dute azken erabakia hartuko. Bestalde, Lurdes Idoiaga aurkeztuko da Oñatiko alkate izateko. Asmo hori agertu du, behintzat. Aurten hartu du Andoni Gartziaren lekukoa, agintaldiaren erdian, honek kargua laga ostean. Gaur egun, Lagun Aron dihardu lanean, Arrasaten.
Erabakia alkateen esku
Beste alkate guztiek ez dute erabaki oraindik zer egin. Arritxu Oliden Aretxabaletako alkateari alderdiak eskatu dio aurkeztea, baina alkateak ez du azken erabakia hartu. Antzeko egoeran dago Jose Angel Zabalo Antzuolako alkatea: alderdiak segitzea eskatu arren, hark une honetan ez du jarraitu nahi, "osasun arazoak medio" eta ezezkoa borobila ez den arren, eta azken erabakia hartu barik duena arren, nahiago du ez jarraitzea eta EAJk beste hautagai bat topatzea.
Juan Karlos Bengoa (EA) Eskoriatzako alkateak ere ez du oraindik erabaki zer egingo duen. Aramaion, bestalde, hautagaia ez dute oraindik aukeratu. Mertxe Mondragon alkateak GOIENKARIAri adierazi dio 15 egun barru zehaztuko dutela zerrenda. Patxi Basauri Elgetako alkateak ere ez du erabaki zer egin. 30 urtetik gora daroatza alkatetzan eta urte gutxi geratzen zaizkio erretiroa hartzeko. Edozelan ere, Elgetako EAJk ez du ezer erabaki oraindik kontu honen gainean.
Leintz Gatzagakoa berezia da. Han alderdiek ez dute aurkezten zerrendarik, zerrenda bakarra aurkezten da, herritarrek aukeratua. Gaur egun Joserra Perez da alkatea.