Bergarako, Oñatiko, Arrasateko, Aretxabaletako, Eskoriatzako eta Soraluzeko musika eskoletako ikasleek kontzertua egingo dute Eskoriatzako kiroldegian. 18:30ean izango da emanaldia eta guztira 135 musikarik esku hartuko dute.
Musika eskola bakoitzeko taldeak hamar minutu inguruko emanaldia egingo du. Hortaz, gehienera, kontzertuak ordu eta erdiko iraupena izango du. Parte-hartzaileen artean denetatik izango da: abesbatza, bandak, kamara taldea, txirula, pianoa, rock taldeak eta beste.
Eskoriatzako taldeak, anfitrioiak, Musika Eskolako Bandaren laguntza izango du, eta emanaldi alaia egingo du: Chu chu cha cha, Mambo bando 1 eta Carnaval en Paris, hain zuzen ere.