Hilabete barru sinatuko dute hitzarmena AFAGIk eta Aldundiak, Nekane Larrañaga elkarteko gizarte laguntzaileak aurreratu bezala, eta beste hilabete beharko dute Debagoieneko zerbitzua prest izateko. Tailerra ez da eguneko zentroa izango, hala ere. Gaixotasunaren lehenengo fasean daudenentzako jarduerak egingo dituzte San Joxepeko egoitzan, AFAGIko bazkide izan edo ez.
Lokala aukeratuta
Hitzarmena sinatzeko bidean badago ere, San Joxepeko instalazioak erabiliko dituztela ia segurua dela aurreratu du Larrañagak. Bertan, tailerraz gainera, senideak artatzeko gelak izango dituzte eta bestelako jardueretarako ere. Bertara joateko autobus zerbitzua egongo dela ere aurreratu dute. Era berean, elkartetik jakinarazi dute, planifikatzen hasteko, zerbitzuan interesa dutenek AFAGIrekin harremanetan jar daitezkeela.