Bergara Hiria da aurre-denboraldiko lehenengo torneoa, eta Bergarak eta Antzuolak atzo egin zuten estreinaldia. Gaur, berriz, Mondrak eta UDAk neurtuko dituzte indarrak (18:00, Agorrosin). Eta bihar bi norgehiagoka horietako irabazleek jokatuko dute finala, hori ere 18:00etan. Berez, aurten Preferentean lehiatuko diren bi taldeek abantaila izan beharko lukete torneo horretan. Horrelako partiduetan, baina, edozer gerta daiteke; gainera, entrenatzaileek probak egiteko erabiltzen dituzte norgehiagoka horiek.
Arrasate Hiria, domekan
Eta atsedenerako asti barik etorriko da Arrasate Hiria txapelketa. Domeka arratsaldean (16:30, Atxabalpe) hasiko dute hiruko txapelketa. Hala, ordu horretan jokatuko dute Aloñak eta UDAk lehenengo zeingehiagoka. 17:30ean etorriko da Mondraren eta oñatiarren arteko zeingehiagoka, eta ordubete geroago, 18:30ean, jokatuko dute Arrasatekoek eta Aretxabaletakoek. Hala, gain-gainean dagoen denboraldi berriari begira, ikusi egin beharko da zeinek ematen duen talde itxura txukunena.