Gaizka Barandiaran dantza-maisu, ikertzaile eta euskaltzain urgazlea hil da

Usoa Agirre 2006ko uzt. 21a, 11:10
Gaizka Barandiaran Balantzategi folklorearen ikertzailea atzo hil zen, Loiolan, 90 urte zituela. Hileta elizkizuna gaur izango da, Loiolako basilikan, 19:00etan. Oñatin jaio zen, 1916ko martxoaren 3an, baina Arrasaten bizi izan zen luzaroan. Filosofia eta Letretan eta Eliz Teologian lizentziatu zen, Tournain eta Marneffen (Belgika) ikasi ondoren, eta Bartzelonako unibertsitatean Filosofiako lizentziatura orokorra atera zuen. Euskaltzain urgazle izateaz gain, dantza irakasle, etnologo eta euskaltzalea zen. Lan ugari utzi ditu, batik bat euskal folklorearen eta euskal dantza tradizionalen ingurukoak.

Besteak beste, Euskal Dantzarien Biltzarraren Hegoaldeko atala sortzeko lan handia egin zuen. 1992an jubilatu zen eta Donostian bizi izan zen, erabat ahuldu eta Loiolako komentura joan arte.

Iazko maiatzean omenaldia egin zioten Euskal Dantzarien Biltzarrak eta Euskal Herriko Txistulari Elkarteak, hamarkadetako lana eskertuz.

Josemari Velez de Mendizabalek liburua osatu zuen orain urte gutxi Barandiaranen biografiarekin.

Euskaltzain urgazle

1961eko abuztuaren 25ean izendatu zuen Euskaltzaindiak Barandiaran euskaltzain urgazle. Ordurako nazioarteko hainbat kongresutan parte hartua zen. Euskal aditzari buruzko liburuak, r kontsonantearen gainekoak, euskararen osaketaz edota dradibikoaren eta euskararen arteko antzekotasunen inguruan idatzi zuen Barandiaranek.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak