Debagoieneko Mankomunitatea, Gipuzkoako Foru Aldundia eta Pesa konpainiaren akordio honen helburua, erabiltzaileei autobus zerbitzu hobea eskaintzea da, lineak hobetuz. Adibidez, orain Oñatitik Zumarragara lauzpabost autobus abiatzen dira; irailetik aurrera, 10 bat izango dira. Horrela, Zumarragatik Donostiara joateko trena hartu nahi dutenek, ordu laurden itxoin beharko dute tren geltokian.
Horrez gain, Eskoriatza-Eibar eta Eskoriatza-Bergara ibilbideak indartu egingo dituzte, baita Donostiara doana ere. Izan ere, autobidetik joango da autobusa, bidaiaren iraupena murriztuz.
Ibilbide zirkular berria
Bestalde, ibilbide zirkular berria sortuko dute. Zerbitzu berri hau Bergaratik irten eta Bergaran bertan amaituko da, Antzuola, Zumarraga, Legazpi eta Oñatitik pasatu ondoren. Zerbitzu honen bitartez, erabiltzaileek ordu eta erdiro izango dituzte eskura autobusak, goizetik arratsalde parteraino.